Астанадағы «Биг Шанхай» базарындағы өртті сөндіруге 15 сағаттан астам уақыт кетті
Қызыл жалын 30 мың шаршы метрден астам аумаққа шарпыған
Астананың Байқоңыр ауданындағы «Биг Шанхай» базарының үш қабатты ғимаратындағы өрт толықтай сөндірілді, деп хабарлайды Azattyq Rýhy Төтенше жағдайлар министрлігінің Telegram каналына сілтеме жасап.
Жалын 30113 шаршы метр алаңға шарпыды. Мамандар өрттің себебін анықтап жатыр.
«Қою түтін мен жоғары температура, өрттің үлкен алаңға таралуы, жанғыш материалдардың көп болуы өртті сөндіру жұмыстарын қиындатты. Сауда павильондарының тығыз орналасуы және өрт ошақтарына шектеулі қолжетімділік қосымша қиындық тудырды», - дейді ТЖМ қызметкерлері.
Құтқарушылардың үйлесімді әрекеттерінің арқасында жақын орналасқан ғимараттарға өрттің таралуына жол берілмеді.
Астанада таңғы сағат үштен бастап төтенше жағдайлар департаментінің қызметкерлері Байқоңыр ауданындағы Алаш тас жолының бойында орналасқан «Биг Шанхай» базарының үш қабатты ғимаратында ірі өртті сөндіруге кірісті. Өрт таңғы сағат жетіде оқшауланған, бірақ толық сөндіру кешкі сағат жетіге дейін жалғасты.
