Ол таныстарының үйінде жатқан
Ақмола облысында екі бірдей адамның із-түзсіз жоғалғанын бұған дейін хабарлаған болатынбыз. Полиция солардың бірі – хабар-ошарсыз кеткен Қарлығаш Ахметжанованы іздеп тапты, деп хабарлайды Azattyq Rýhy тілшісі Ақмола облысының полиция департаментінің баспасөз қызметіне сілтеме жасап.
43 жастағы әйел Краснояр саяжайларының біріндегі танысының үйінде қонақта болған. Есте болса, полицияға оның жоғалып кеткенін айтып 10 маусымда әпкесі арызданған болатын.
«2 маусым күні үйінен шығып қайта оралмаған Қарлығаш Ахметжановадан осы уақытқа дейін еш хабар болмады. 13 маусымда жедел-іздестіру шараларының нәтижесінде тәртіп сақшылары Қарлығашты Краснояр саяжай массивтерінің бірінен іздеп тапты. Ол таныстарының үйінде қонақтап жатқан болып шықты. Оның туған-туыстарымен не үшін байланысқа шықпағаны анықталып жатыр», - деді Ақмола облысы полиция департаментінің баспасөз хатшысы Әсем Әбдірахманова.
Кейін белгілі болғанындай, Қарлығаш Ахметжанова бұған дейін де үйінен бірнеше рет кетіп қалып, бірнеше күн өткеннен кейін қайта оралған екен. Әпкесінің полицияға тек 8 күннен кейін арызданғаны да сондықтан.
Қарлығаш Ахметжанова осы жылдың мамыр айынан бастап әпкесімен бірге тұрған. Наркологиялық және психоневрологиялық есепте тізімде болмаған және қымлыстық жауапкершілікке тартылмаған.
Ақмола облысы полиция департаментінің мәліметінше, өңірде соңғы уақытта із-түзсіз жоғалған адамдардың қатары артқан. Тек жыл басынан бері ғана Ақмола облысында 29 адам хабар-ошарсыз кеткен. Полицияның жедел-іздестіру шараларының нәтижесінде 25 адам табылды. Тәртіп сақшылары тұрғындардан өз жақындарына абай болуды өтінеді.
Абзал Алпысбайұлы, Ақмола облысы