Жүкті әйелге 4 рет несие алдыртқан: Ақтөбеде адамды «гипноздап» тастайтын емші сотталып жатыр

Ақтөбеде адамдарға гипноз жасап, несие алғызған емші 50 жастағы Сұлушаш Қазыбаеваға қатысты сот процесі өтіп жатыр. Ол ҚР ҚК 190-бабы «Ірі көлемдегі алаяқтық» бойынша айыпталған, деп хабарлайды Azattyq Rýhy.

Мой Город басылымының жазуынша, жәбірленушілер саны 90 адамнан 138 адамға көбейген. Емші олардан  572,9 млн теңгені алдап алған.

Емделем деп барып, қалтасы қағылған жас ана Сұлушаш Қазыбаеваға қалай алданғанын айтты.

«Ол кезде аяғым ауыр болатын. Дәрігерлер іштегі сәбидің Даун ауруына шалдыққанын айтты. Ұзақ күткен баламыз еді, жынысын да біліп алғанбыз, қатты қиналдым. Жұмыстағы әріптесім Сұлушашқа барып көруді ұсынды. Бардым. Ол менің ішімді ұстады да, «бала сырқат емес, алдырудың керегі жоқ, алайда бүйрегіңді емдеу керек» деді. Мен оның оқып берген суын ішіп, Құран оқыдым. Келесі күні барғанда, ол маған әлі  10 күн қатарынан келуім керек екенін айтты. Сол кезде Сұлушаш несие алуды сұрады. Алғашында бас тарттым, бірақ кейін ол телефонды қолыма беріп: «Қане, көрейік», – деп көндірді. Сол сәтте өз ісімен есеп бермедім. Қазір шамамен 7 миллион теңгеге қарызға кірдім. Несиені балама берілетін жәрдемақыдан төлеп жатырмын. Өткен жылдың шілде айында босандым, балам аман-есен, жолдасым да көмектеседі», - деді ол.

Келіншек бір емес, 4 рет несие алған. Оның бәрін 2023 – 2024 жылдары емші алдырған екен.

«Банктерге ай сайын  360 мың теңге төлеуім керек болды. Менің ондай ақшам жоқ. Сұлушаш былтырғы қараша айына дейін несиені төлеп жүрді. Содан кейін қойып кетті. Қаңтарда оның ұсталғанын теледидардар көрдім, мен сияқты көп адамды алдапты. Қараша мен желтоқсанда әупірімдеп жүріп несиені төледім. Қазір екі банк сот процесіне орай төлемдерді тамыз айына дейін тоқтатты. Қалған екеуіне 110 мың теңгеден төлеп жатырмын», - деді әйел.

Айтуынша, ол емшінің арбауынан шыға алмай қалған. Еске салсақ, қаңтар айында ақтөбеліктер бақсы әйел гипноздап, қарызға батырды деп шулаған еді. Ақтөбе полициясы Сұлушаш Қазыбаеваға қатысты қылмыстық іс қозғағағанын хабарлаған болатын.