Алматы облысында өртеніп жатқан қоқыс полигонын ТЖД екі күннен бері сөндіре алмай жатыр

Өртті сөндіруге тікұшақ жұмылдырылған. Қоқыс полигонының аумағы – 38 гектар. Алайда от кең далаға жайылып кеткен, деп хабалдайды Azattyq Ruhy тілшісі.

Өртті ауыздықтау үшін 30 техника жұмылдырылды. Сондай-ақ, 3 тонна су тасмалдағыш құрылғысы бар МИ-8 тікұшағы да көмекке келген.

Тілсіз жаумен күрес түні бойы тоқтамай жүргізілгенімен, қою түтін көз жетпес кең даланы әлі басып жатыр.

«Оқиға орнында Алматы облысы ТЖД жеке құрамынан 40 адам, 8 бірлік техника, Іле ауданы әкімшілігінен 26 адам, сондай-ақ, 10 су тасушы техника, 3 бульдозер, 3 тиегіш, 5 самосвал жұмыс істеуде. Қоқыс тастайтын жердің жалпы ауданы – 38 гектар. Өрт орнында үздіксіз су беру ұйымдастырылды. Сонымен қатар, қазіргі уақытта жану ошақтарын қайта құнарландыру және топырақпен жабу бойынша іс-шаралар жүргізілуде», - деді Алматы облыстық ТЖД ресми өкілі Азамат Жұртбаев.

Алматы қаласы мен облыстан шыққан тұрмыстық қалдықтарды тастайтын полигонында өрт 10 маусым күні басталған еді. Қою түтін Алматы – Қапшағай тас жолын жауып, соның салдарынан ондаған автокөлік апатқа ұшырады, 6 адам ауыр жараланып ауруханаға түсті.

Әмірболат Құсайынұлы, Алматы облысы