Ол өмірді сүйетін әрі өте мейірімді жан ретінде есте қалды
2024 жылғы 18 мамырда Египеттің Шарм-эль-Шейх халықаралық әуежайында Астанаға ұшуға дайындалып тұрған Қазақстан азаматы Ақмарал Мұқанова жазатайым оқиғадан қаза тапты. Әуежайдағы ауыр жарнама экраны құлап, әйел астында қалып қойған. Марқұмның кіндік баласы, журналист Анвар Шалекенов Ақмарал Мұқанова туралы естелігін айтты, деп хабарлайды Azattyq Rýhy.
«Менің анамның бала кезден дос болған жақын құрбысы еді. Ашық-жарқын, үнемі күлімдеп, бәріне шуағын шашып жүретін. Өте мейірімді кісі болды. Саяхаттағанды жақсы көретін, әсіресе ұлын ертіп алып жиі саяхаттайтын. Тіпті Ақмарал апа туралы өткен шақта сөйлеуге тілім бармайды»,- деді ол.
Марқұм әйел Ақтөбе облысының полициясында ұзақ жылдар бойы қызмет етіп, зейнетке шыққан ардагер. Кейінірек Астана қаласында ұлымен бірге тұрған. Ол өмірді сүйетін, мейірімді жан ретінде есте қалды.
«Өзіміз қаралы хабарды жексенбі күні естідік. Өте қиын. Бұлай болады деп ешқашан ойлап көрмеппін»,- деді журналист Анвар Шалекенов.
Еске салайық, оқиға кезінде төрт қазақстандық азамат зардап шеккен. Екеуі ауруханаға түсті, қалғандарына алғашқы медициналық көмек көрсетіліп, қайтадан қонақ үйге жатқан.
Қайғылы оқиғаның үстіне әуежайда жанжал болып жатқан. Сол сәтте Египет қызметкері бірнеше туристің – соның ішінде Қазақстан азаматтарының төлқұжатын алып қашқан. Ол ұсталып, құжаттарды қайтып береді.
ҚР Сыртқы істер министрлігі мәлімдегендей, консул марқұмның туыстарымен байланыс орнатып, барлық қажетті көмекті көрсетіп жатыр. Сонымен қатар, Египеттің азаматтық авиация министрі бұл оқиғаны жеке бақылауына алып, арнайы тергеу комиссиясын оқиға орнына жіберген.