Мототуристке пышақ сұққан күдікті 7 жылға дейін сотталуы мүмкін

Жамбыл облысының Меркі ауданында жанармай құю бекетінде суық қаруды қолдану арқылы жасалған шабуыл фактісі бойынша ішкі істер органдары қылмыстық істі тергеп жатыр, деп хабарлайды Azattyq Rýhy.

Күдікті ізін суытпай ұсталып, соттың санкциясымен қамауға алынды.

«Осы факті бойынша Қылмыстық кодекстің 293-бабының 3-бөлігі бойынша (пышақпен жасалған бұзақылық) 7 жылға дейін бас бостандығынан айыруды көздейтін қылмыстық іс қозғалды.

Қылмыстық іс Жамбыл облысы ПД Тергеу басқармасының өндірісіне қабылданды, жедел-тергеу тобы құрылды. Жедел-тергеу тобының жұмысын үйлестіру үшін аймаққа ІІМ орталық аппаратының қызметкерлері жіберілді. Оқиғаны толық және жан-жақты тергеу қамтамасыз етіледі», - деп хабарлады ІІМ.

Күдіктінің іс-әрекетін қайта саралау туралы мәселе тергеу әрекетінің нәтижесі және қадағалау органының келісімі бойынша қаралатын болады.

Сонымен қатар адвокаттың өтініші бойынша жәбірленушіге полиция қызметкерлері қатарынан күзет қамтамасыз етілді. Тергеу барысы ҚР ішкі істер министрінің ерекше бақылауында.

Еске салсақ, Меркі ауданында Шымкентке жол тартқан мототуристердің бірін ер адам жанармай бекетінде пышақтап, оқиға орнынан қашып кеткен еді.