Астанада 1,5 жасар баланың үстіне қайнап тұрған шәйнек құлап кетті: сәбидің жүрегі он минутқа тоқтап қалған (ВИДЕО)

Астанада анасының жанында, ас үйде ойнап жүрген 1,5 жастағы ұл баланың үстіне қайнап тұрған шәйнек құлап кетіп, денесінің 25 пайызын күйік шалған. Ең қиыны, бала реанимацияға бара жатқанда, оның жүрегі 10 минутқа тоқтап қалған, деп хабарлайды Azattyq Rýhy.

Баланың анасы Наталья Шлыкова сол күнді көзіне жас ала отырып еске алды.

«Ас үйде, менің жанымда ойнап жүрген. Бір сәтке бұрылып кеттім, кенет, баламның үстіне енді қайнаған шәйнек құлап кетті. Кеудесі қатты күйді, сондықтан балам шок алып, жүрегі тоқтап қалды», - дейді ол.

Астанадағы №2 көпбейінді балалар ауруханасының дәрігерлері бұл баланың аман қалып, жүрегінің он минуттан кейін қайта соғып кеткені – таңғажайып оқиғаға тең дейді. Өйткені, көбіне, адамның жүрегі тоқтап қалса, оны 4-5 минут ішінде ғана қайта соқтыруға болады екен.

«Бұл дегеніміз ерекше дүние болды. Біз баланың жүрегіне адреналин бердік. Бала басында, жүрегі тоқтап, қайта соққаннан кейін бірнеше күн тұрақсыз күйде болды. Өзі демала алмады. Бірақ, қазір жағдайы жақсы әрі тұрақты», - дейді аурухананың бөлім меңгеруішісі Нұрсұлтан Құрбанбеков.

КТК арнасына сұхбат берген анасы баласын бір ажалдан аман алып қалған дәрігерлерге алғысын айтып жеткізе алмаған. Оның айтуынша, сәбиі бастапқы сегіз күн бойы өзі демала алмай, аппаратта жатқан. Қазір сауығып, өзі демалып, өзі тамақ ішеді.