Сәтбаев қаласында біреудің суретін Facebook-ке рұқсатсыз жариялаған адамның басы дауға қалды

Сәтбаев қалалық соты Facebook әлеуметтік желісіндегі сурет үшін соттасқан екі тараптың ісін қарады, деп хабарлайды Azattyq Rýhy.

Істің мән-жайына үңілсек, 2023 жылдың 28 шілдесінде НБ есімді адам әлеуметтік желідегі жеке парақшасына С есімді адамның суретін рұқсатсыз жүктеп, оның өмірі туралы жазған. Бұл екі адам Facebook-те «дос» болмағандықтан, С есімді азамат сотқа жүгініп, арыз жазған.

«С есімді азамат жеке бейнесін рұқсатсыз жүктеген адамға қатысты арыз жазды. Оның айтуынша, оның суреті – оның жеке мүліктік құқығы, оны рұқсатсыз жариялауға ешкімнің қақысы жоқ. Ол НБ-ның үстінен арыз жазып, суретін жоюды және әлеуметтік желіде жария түрде кешірім сұрауын талап етті. Сондай-ақ моральдық шығын ретінде 500 мың теңге талап етті», - деп хабарлайды Ұлытау облысы сотының баспасөз қызметі.

Сот оның арызын ішінара қанағаттандырып, мынандай шешім қабылдаған:

НБ есімді азамат С-ға моральдық шығын ретінде 100 мың теңге төлеп, әлеуметтік желіде оның суретін өшіріп, жария түрде кешірім сұрауы тиіс. Апелляциялық сот бұл шешімді өзгеріссіз қалдырған. Үкім заңды күшіне енген.