6 жылдан бері іздеуде жүрген ақтөбелік қылмыскер ұсталды

11 мамырда ақтөбелік полицейлер қымбат автокөліктерді ұрлағаны үшін 6 жыл бойы іздеуде жүрген 39 жастағы Ақтөбе тұрғынын ұстады. Бұл туралы Ақтөбе облысы Полиция департаментінің баспасөз қызметі хабарлады.

Ұсталған азамат Ақтөбе қаласының тергеу изоляторына қамалып, оған қатысты ұрлық фактілері бойынша тергеу амалдары жүргізіліп жатыр.

«Материалдарға сәйкес, 2013 жылдың 26 қазанында ұсталған ер адам ресейлік екі азаматпен бірге 11 шағынаудандағы күзеті бар автотұрақтан «Toyota Land Cruiser 200» маркалы көлігін айдап әкеткен. Күдіктілер ұрланған автокөліктен РФ-ға шығуға тырысты. Алайда, Қарғалы ауданында көлік тоқтатылып, Ресейдің екі азаматы оқиға орнында ұсталып, үшінші күдікті (Ақтөбе қаласының тұрғыны – ред.) оқиға орнынан қашып үлгерген. Содан кейін ер адамға іздеу жарияланды», - делінген хабарламада.