Шымкентте 300 адам іздеген бала ұйықтап жатқан жерінен табылды

Шымкентте ойнап жүріп, жоғалып кеткен баланы 300-дей адам алты сағат бойы іздеген, деп хабарлайды КТК арнасы. 

Сегіз жасар Жасұлан көрші балалардан тығылыпты. Оны іздеп таба алмаған жеткіншектер тарап кетіп, кешкі сағат сегізде ата-анасы шарқ ұрып іздейді. Арада екі сағат өткенде олар полицейлердің көмегіне жүгінеді. Көрші-қолаң, тәртіп сақшылары – 300-ге тарта адам аяқтан тозып іздеп жүрсе, бала есік алдында тұрған қораптың астында ұйықтап жатыпты.

Бірнеше сағат бойы жеңіл киіммен жатқан Жасұлан тоңып қалғаны болмаса, дін аман.

«Баланы іздеуге көмектескен баршаңызға рақмет! Аман-есен табылды. Көршілеріме ризамын», - деді баланың әкесі.