Шығыс Қазақстан халқы алпыс жыл армандаған көпір ашылды (ФОТО)

Шығыс Қазақстан облысында халық 60 жыл армандаған көпір ашылды. Бұқтырма су қоймасы арқылы өтетін көпірдің ашылуына премьер-министр Олжас Бектенов қатысқан, деп хабарлайды Azattyq Rýhy.

Үкіметтің баспасөз қызметі хабарлағандай, енді осы көпірдің арқасында халықтың ел ішіндегі және шекаралас елдерге баратын жолдары едеәуір қысқарады. Көпірдің ашылу салтанатына келген Күршім ауданының құрметті азаматы Бақытхан Өлмесеков бұл көпірді ел-жұрт алпыс жыл армандаған дейді.  

«2019 жылы осы өңірдің халқы еліміздің Президентіне арыз-тілегін жазған. Қасым-Жомарт Кемелұлы Тоқаев халықтың тілегіне көңіл бөліп, елдің 60 жыл армандаған көпірін салуға қазынадан қаражат бөлді. Жобада еңбек еткен тек еліміздің азаматтары. Шетелден тартылған бірде-бір маман жоқ. Қаншама кісіге жұмыс табылды. Құрылыс қыстың аязында, жаздың аптап ыстығында да жүргізілді», - деді Бақытхан Өлмесеков.

Ал, Алтай аудандық мәслихатының төрағасы Лариса Гречушникова болса, көпір жоқ кезде халық жолға бірнеше сағат жұмсайтын дейді. Премьер-министр Олжас Бектенов болса Бұқтырма көпірі сияқты ірі жобаларды шетелдік емес, отандық жұмысшылар орындағанын алға тартты. 

«Мемлекет басшысы аталған жобаға, жалпы өңірлердің дамуынап үлкен көңіл бөліп келеді. Сіз дұрыс айттыңыз, әрі жұмыс беріп әрі инфрақұрылымдық байланыс пен дамуды қамтамасыз ететін мегажобалар көп болуы керек. Сырттан ешкімді тартпай-ақ, біздің өз құзыретіміз де жеткілікті. Осындай республикалық маңызы бар осындай ірі жобаларды жүзеге асыруды жалғастырамыз. Қазір Президенттің тапсырмасы бойынша Үкімет отандық кәсіпкерді, отандық өндірушілерді қолдау саясатын жүргізуде», - деп атап өтті Олжас Бектенов.