Израильдің соққысынан бір ауылда 21 адам көз жұмды

Ливанның солтүстігіне жасалған соққыдан 21 адам қаза тауып, 8 адам зардап шекті, деп хабарлайды Azattyq Rýhy BBC-ге сілтеме жасап.

Израиль әскері әдетте шабуыл жасай бермейтін Айту ауылына бомба тастады. Бұл ауылды Ливанның оңтүстігінен - соғыс өртінен қашып келген отбасылар паналаған, шабуылдан кейін олар тағы да баспанасыз қалды.

Айту тұрғындарының сөзінше, соққы жасардың алдында ешбір белгі берілмеген. Соққының қатты болғаны сонша, қаза тапқандардың кім екенін ДНҚ тестімен ғана анықтауға болады.

Voice of Lebanon ақпарат құралының хабарлауынша, мұнда Ливанның оңтүстігінен туысқандарымен бірге көшіп келген «Хезболла» ұйымының мүшесі бар болуы мүмкін.

Айта кетсек, таяуда Нью-Йоркте өткен БҰҰ Бас Ассамблеясының сессиясында әлемдік көшбасшылар Газа секторында қарулы қақтығысты дереу тоқтатып, Таяу Шығыстағы зорлық-зомбылыққа нүкте қоюға шақырды.