Жүргізушіге әкімшілік жаза қолданылып, көлік айып тұрағына қойылды
Оқиға 25 қыркүйекте 4-ші шағын ауданда, Holiday Inn қонақүйінің маңында болған. Куәгерлердің айтуынша, жеңіл көлік жүргізушісі басқару жүйесін игере алмай, жолдың шетіне соғылып, жаяу жүргіншіні қағып кеткен, деп хабарлайды Azattyq Rýhy Lada.kz-ке сілтеме жасап.
Куәгерлер оқиғаны видеоға түсіріп, көліктің қоршауға соғылғанын көрсеткен. Жол-көлік оқиғасы салдарынан бір адам зардап шекті.
Маңғыстау облыстық полиция департаментінің баспасөз қызметі бұл ақпаратты растады. Полиция мәліметі бойынша, Toyota Camry көлігінің жүргізушісі көлік тізгінін игере алмай, бордюрге соғылып, жақын жерде тұрған ер адамды қағып кеткен.
Жол қозғалысы ережелерін бұзған жүргізушіге әкімшілік жаза қолданылып, көлік айып тұрағына қойылды.
Маңғыстау облыстық көпсалалы ауруханасының баспасөз қызметі зардап шеккен адамның жағдайы туралы мәлімдеді. Травматология бөліміне орта жастағы ер адам түсті, қазіргі уақытта ол жансақтау бөлімінде. Дәрігерлердің айтуынша, пациентте жабық бас-ми жарақаты, мидың шайқалуы, оң және сол жақ жамбас сүйектерінің жабық сынуы, сол жақ асықты жілік сынған. Жағдайы тұрақты деп бағаланып отыр.