Тоғыз айда 6 адам газ баллоны жарылысынан көз жұмған

36 адам ауруханаға түскен

Фото: ТЖМ

Жыл басынан бері елімізде 17 рет газ баллоны жарылысы болып, одан 6 адам қаза тапты, деп хабарлайды Azattyq Rýhy.

Құтқарушылар өрт орындарынан 961 газ баллонын шығарса, оның ішінде 50 литрлік 194 баллон болған. Былтыр баллондардың жарылысы, газ-ауа қоспасынан болатын жарылыстар 128 рет тіркеліп, 21 адам қаза тапты, 167 адам жарақат алған.

ТЖМ халықты газ баллондарын пайдалану ережелерін қатаң ұстануға, сақтық шараларына шақырды:

баллондарды тек мамандандырылған пункттерде толтырыңыз. Автожанармай құю станцияларында тұрмыстық газ баллондарын құюға тыйым салынады;
екі қабаттан асатын көпқабатты тұрғын үйлерде газ баллондарын пайдаланбаңыз;
баллон корпусының қызуына жол бермеңіз;
үй-жайда газдың иісі шықса, газ беру кранын жауып, үй-жайды желдету үшін терезелер мен есіктерді дереу ашу керек, ашық отты пайдаланбау керек және электр қуатын қоспау қажет;
жұмыс істеп тұрған газ құрылғыларын қараусыз қалдырмаңыз;
балаларға газ құралдарын пайдалануға жол бермеңіз;
газдың шығуын тексеру үшін сабын ерітіндісін қолданыңыз.
Газ жабдықтарын уақтылы тексеру және жөндеу қажет. Ақаулы жылыту аспаптары мен газ жабдықтарын пайдалануға тыйым салынады.