Қарағанды облысында 22 жастағы жігіт әйелді көлікпен қағып кетті (ВИДЕО)

Қарағанды облысының Саран қаласында 22 жастағы автокөлік жүргізушісі 43 жастағы әйелді көлікпен қағып кетті. Соққы салдарынан зардап шеккен әйел комаға түсіп, қайтыс болды, деп хабарлайды Azattyq Rýhy.

Марқұмның туыстары жүргізушінің әйелді  әдейі қағып кеткеніне сенімді. Оқиға 16 тамызға қараған түні орын алған, бірақ бұл туралы қайтыс болған адамның туыстары әлеуметтік желілерде оқиғаның видеосын жариялағаннан кейін, 6 қыркүйекте ғана белгілі болды.

Кадрлардан көліктің бос жолда әйелді қағып кеткенін көруге болады. Видеоға қарағанда, жүргізуші әйелді айналып өткісі келген сыңайлы. Алайда соңғы сәтте көлік оны қағып кетті.

Марқұмның туыстарының айтуынша, ол соққыдан бірнеше метрге бұталардың арасына ұшып кеткен, оны кездейсоқ куәгерлер тауыпты. Олар жедел жәрдем мен полицияны шақырады. Ал жүргізуші апат орнынан қашып кеткен.

«Сол түні әпкем құрбысымен кездесіп,  үйіне қайтып бара жатқан. Оны қағып кеткен жүргізуші көлікті ұрлап кеткен екен, онымен бірге тағы екі адам болған. Оны Саранда танитындар көп, олар туралы теріс пікірлер жиі айтылады. Ол еш жерде жұмыс істемейді, қызық қуып жүріп уақытын өткізеді екен. Сол түні ол алкоголь немесе есірткі тұтынған болуы мүмкін. Кейбіреулер оны сол түні даңғылда осы көлікте көргенін айтады, ол сол жерде жүріпті. Содан кейін Чкалов көшесінде Олеся екеуінің арасында қандай да бір жанжал туындап, ол Олесяны қағып өлтіремін деп қорқытқан.  Бірақ мұның бәрін бізге адамдар айтты. Сол түні нақты не болғанын біз білмейміз», - деді марқұмның әпкесі Людмила Жағыпарова.

Апаттан кейін зардап шеккен адам комаға түсті. Дәрігерлер оның өмірі үшін соңына дейін күресті, алайда апаттан 17 сағат өткен соң әйел қайтыс болды.

«Оның өкпесі мен басқа ішкі мүшелері жыртылып, қабырғалары, жамбастары, қолдары сынған. Біз оны мәйітханадан алып кеткенде, сау жері болмады. Ал әлгі жүргізуші бүгінгі күнге дейін ешнәрсе болмағандай бостандықта жүрді. Ол тіпті шахтерлер күніне арналған концертке барып, бәріне бізге ақша төлеп, мәселені шешкенін айтып жүр екен. Біз одан ешнәрсе алған жоқпыз. Оның анасы әпкемнің күйеуімен байланысуға тырысыпты, ұлының өмірін бұзбауды өтінді, бірақ біз оның заң бойынша ең қатаң жазаға тартылғанын қалаймыз. Видеода оның Олесяны әдейі қаққаны анық көрінеді», - деп қосты Олеся Андронованың әпкесі Людмила.

Марқұмның артында үш баласы қалды, олардың бірі кәмелетке толмаған. Марқұмның туыстары полицияда куәлік беріп, оқиғаның егжей-тегжейін айта алатын, болған оқиғаның куәгерлерін іздейді.

«Саран полициясы күдікті біз оқиға туралы әлеуметтік желілерге жаза бастағаннан кейін ғана оны қамауға алды. Біз әлі күнге дейін алкоголь мен есірткіге сараптама нәтижелерін білмейміз, одан қан алу керек еді. Біз оны абайсызда өлімге әкеп соқтырған жол ережесін бұзғаны үшін емес, қасақана кісі өлтіргені үшін қылмыстық жауапкершілікке тартқымыз келеді», - деп қосты марқұмның әпкесі.

Қарағанды облысының ПД баспасөз қызметі бұл жағдайға түсініктеме берді. Ведомствода BMW автокөлігінің 22 жастағы жүргізушісі ұсталып, уақытша ұстау изоляторына қамалғаны туралы хабарланды.

«16 тамызда Қарағанды облысының Саран қаласында болған жаяу жүргіншінің сотқа дейінгі тергеуі басталды. Қазіргі уақытта объективті және жан-жақты тергеуге бағытталған барлық қажетті іс-шаралар кешені жүргізілуде», - деп хабарлады баспасөз қызметі.