Семейде ХҚКО-ның қызметкері жалған мәлімет жазған: 16 млн теңге шығын келді
Ол 3 жылға сотталды
Семей қаласының N2 соты алдау және ауыр зардаптарға соқтырған мәліметтерді заңсыз өзгерту фактісі бойынша ХҚКО-ның қызметкеріне қатысты үкім шығарды, деп хабарлайды Azattyq Rýhy.
«Азамат Т., мамандандырылған халыққа қызмет көрсету орталығының маманы бола тұра, ақпараттық жүйеге тіркелген көліктердің санаты мен шығарылған жылы туралы көрінеу жалған мәліметтерді енгізген. Оның қылмыстық әрекетінің 2 фактісі анықталды», - делінген Жоғарғы сот ақпаратында.
Ол Форд F150, «RENAULT MAGNUM» көліктеріне қатысты жалған ақпараттар толтырған.
Екі көліктен мемлекетке 16 миллион теңгеден астам шығын келген.
«Сот жаза тағайындау кезінде кінәні толық мойындау түріндегі жеңілдететін мән-жайлардың болуын және жас балалардың болуын ескерді. Сот үкімімен Т.-ға 3 жыл мерзімге коммерциялық емес акционерлік қоғамдарда лауазымдарды атқару құқығынан айыра отырып, 3 жылға бас бостандығынан айыру жазасы тағайындалды», - делінген сот үкімінде.
ҚК-нің 63-бабын қолдана отырып, Т.-ның жазасы пробациялық бақылау белгіленіп, шартты түрде белгіленді. Келтірілген шығынды көлік иелері толық өтегендіктен, іс бойынша азаматтық талап қойылмаған.
Үкім заңды күшіне енді.
