Қазақстандықтардың банк картасынан алаяқтар жаппай ақша шешіп жатыр

Қазақстандықтардың Halyk bank картасынан алаяқтар түнгі уақытта ақша шешіп алған. Алаяқтардан зардап шеккен адамдардың қарасы көп, деп хабарлайды Azattyq Rýhy.

Банк клиенттері ақша қайдан шешіліп жатқанына таңырқаған, себебі олар онлайн ештеңеге тапсырыс бермеген, жазылмаған. Алайда карталарынан қомақта соманы көз алдарында шешіп әкеткен. Олардың қарасы шетелдік компаниялардың қызметіне төленді деп шешілген. Алаяқтардан зардап шеккендердің бірі - Әсемгүл Жүнісова.

«1-2 тамыз күні менің Halyk bank картасынан 261 мың теңге facebook үшін шешіліп алынды деген бірнеше транзакциялар жасалды. Екі күн қатарынан 1400 теңгеден бастап 33 мың теңгеге дейін шешкен. Менің картамда хабарлама келетін қосымшасы болмаған еді. Банктің өзі «сіздің транзакцияңыз ашық тұрған» дейді. Алайда минут сайын 2600, 4800 теңгені facebook үшін шешіп жатқанда банктің қауіпсіздік қызметі назар аудармаған, маған да хабарласпаған. Ақша Филиппиныдың песо валютасымен есептеліп шешілген. Ал facebook әлеуметтік желісінде мен тіркелмегенмін, аккаунтым да жоқ. Банк картасының мәліметтерін ешкімге жібермедім. Себебі ол негізгі емес, қосымша карта болатын», - дейді Жүнісова.

Ол осы мәселе бойынша банкке жүгінген. Банк қызметкерлері 5 тамызда арыз қабылдаған.

«Алайда олар 9 қыркүйек жауап береміз деді. Ол мәселе бойынша тексеріс жүргіземіз деп айтты. Ал мен сияқты адамдар көп екен. Қазақстанның түкпір-түкпірінен зардап шеккендер ортақ топ ашқан. Ол топқа чатқа қосылып жатқан адамдар қарасы өте көп. Күн сайын ақша шешіліп жатқан адамдардың саны тоқтар емес. Оның барлығында ақша Таиланд, Бразилия, Филиппины елдерінен шешілді делінген. Осыған бір тоқтау болмай отыр. Қызығы, бірден қомақты қаржы шешілмейді, аз-аздан үлкен сомаға өтеді. Түрлі елден қаржы шешіп жатқан кезде банктің қауіпсіздік жүйесі көрмей жатқанына таңқалып отырмыз. Банктің өзі «картадағы ақша үшін өздеріңіз жауаптысыздар» деп айтады. Ал қанша клиенттен ақша шешіліп жатқанда тексеріс жүргізіп, транзакция тоқтатылмаған», - дейді Әсемгүл Жүнісова.

Ал ақтаулық Жадырадан 13 тамызда Бразилиядағы сауда үшін ақша шешіп алған.

«2024 жылғы 13 тамызда сағат 23:13-тен 23:24-ке дейін халық банктегі шотымнан Бразилиядан сауда жасадың деп ақша шешіп алған. Бірақ, мен ол кезде ұйықтап жатқанмын. Екінші күні «Халық банкке» арыз жаздым, «менің ақшамды белгісіз біреулер шешіп алған, шара қолданыңыз» дедім. «Біз білмейміз, мүмкін өзіңіз рұқсат берген шығарсыз, 2 апта күтіңіз» деді. Сол күні Әйгерім Баданның әлеуметтік желідегі парақшасынан осы менің жағдайымдағы оқиғаны көріп қалып хабарластым. Сол кісі банктен зардап шекендерге топ ашып қойды, қазір 45 адам болдық. Айдың күні аманында ақшамыздан айрылып қалып отырмыз», - дейді ол.

Тағы бір банк клиентінен 139 мың теңгені Дубайдан шешіп алған.

«Банкке хабарластым, олар менің картамды бұғаттады. Тексеріс жүргіземіз деп айтты. Алайда бір ай өтті, әлі де ештеңе шешілмеді», - деді ол.

Жібек те өзінің оқиғасын айтып берді.

«Зардап шеккендердің бәрінде бір жағдай болған сияқты. Маған 26 маусымда 137 мың теңге шәкіртақым түсті. Жарты сағаттан кейін картамнан ақша шешіп алды. Ақшаны өзге картаға аударып немесе шешіп алуға үлгермей қалдым. Банкке жүгіндім, екі аптадан кейін мәселені шешеміз деді. Қазір үшінші апта өтті, әлі ештеңе шешілмеді. Мен өзім студентпін, оған тек шәкіртақым ғана түседі. Ешбір операция жасамаймын», - дейді ол.

Блогер Әйгерім Бадан да әлеуметтік желі басынан өткен жағдайды айтып берген. Оның банк картасынан Таиландтан ақша шешіп алған.

«Мен Таиландта осыдан 5 жыл бұрын болдым. Картамнан алдымен 42 мың теңге шешіп ұлғая берді. Жалпы 295 мың теңге шешіп алды. Менде банктің қауіпсіздік қызметіне қатысты сұрақтарым өте көп. Бірінші операциядан кейін менің картам бұғатталуы керек еді. Мен Қазақстанда отырсам да, ақша Бангкоктан шешілген. Банк маған хабарласуы керек еді. 2 минутта барлық ақшамды шешіп алды. Клиенттер қорғалмай отыр», - дейді ол.

Редакция осы мәселеге қатысты құзырлы органдар мен банк әкімшілігіне хабарласады.