Павлодар облысында үш жасар бала әткеншектен соққы алып, бауырының бір бөлігінен айырылды

https://pavon.kz/post/view/76988Бала ойын алаңында зардап шеккен. Нәтижесінде, ол ауруханада 40 күнге жуық уақыт өткізіп, бір апта бойы жансақтау бөлімінде болды, деп хабарлайды Azattyq Rýhy Павлодар-онлайнға сілтеме жасап.

Қайғылы оқиға шілденің басында болған. Алайда, ата-аналар дәрігерлерге тек бір аптадан кейін ғана жүгінген. Балада көрінетін жарақаттар болмағандықтан, ересектер жағдайдың қаншалықты ауыр екенін түсінбеген.

«Шілденің басында бала ойын алаңында ішіне әткеншек соғылып, жарақат алған. Бір апта өткен соң баланың жағдайы күрт нашарлаған. Ата-аналар баласының іші ауырғанына шағымданып, Ақсу қаласының ауруханасына жүгінген. Дәрігерлер ультрадыбыстық диагностика жасап, іш қуысына көп мөлшерде қан жиналғанын анықтады», - деп мәлімдеді облыстық балалар ауруханасы. -

Балаға іш қуысының жабық жарақаты, ішкі органдардың соғылуы, бауырдың оң жақ бөлігінің толық жыртылуы диагнозы қойылды. Ішкі қан кету басталған. Сондай-ақ баладан өкпе ісінуі мен екінші дәрежелі геморрагиялық шок анықталды. Ақсуға санавиация бригадасы ұшып шығып, операцияны сол жерде жасады.

Операциядан кейін бала шұғыл түрде Павлодардағы облыстық балалар ауруханасына жеткізілді. Онда дәрігерлер бірнеше апта бойы баланың өмірі үшін күресті.

«Жарақаттың ауырлығын ескере отырып, бауырдың жыртылуы және массивті қан жоғалту салдарынан балада келесі күні ми ісінуі дамыды», - деп нақтылады облыстық балалар ауруханасы.

Реаниматолог дәрігерлер ми ісінуі мен жедел бауыр жеткіліксіздігін тоқтата алды. Кейін хирургиялық бөлімнің дәрігерлері әртүрлі операциядан кейінгі асқынулармен күресіп, бауырдың қалпына келуін бақылап отырды.

Үш жасар бала стационарда 37 күн болды, бүгін оны ауруханадан шығаруда. Оған біраз уақыт хирург және гематологтың бақылауында болу қажет.