Алматыда өртеніп кеткен үйден ерлі-зайыпты зейнеткердің мәйіттері табылды

Алматыда 27 шілде күні таңғы сағат төртте жеке үйде шыққан өртті сөндіру кезінде екі адамның мәйіті табылды. Артынша, бұл осы үйдің иесі – ерлі-зайыпты зейнеткерлер екені анықталды, деп хабарлайды Azattyq Rýhy.

CMN.KZ жазуынша, 71 жастағы қарияға алдымен пышақпен шабуыл жасалған. Оның кеудесіне соққы жасалып, ізін жасыру үшін үйді әдейі өртеген болуы мүмкін. Ал екінші зейнеткер – қарияның әйелі басқа бөлмеден табылды. Ол тірідей өртеніп кетті ме, әлде ол да пышақ жарақатын алды ма, әлі белгісіз.

«Қылмыс жасады деген күдікпен 46 жастағы ер адам ұсталып, қамалды. Болжам бойынша, ол жанжал кезінде қарияға пышақпен шабуыл жасаған. «Кісі өлтіру» бабы бойынша қылмыстық іс қозғалды», - деп жазды басылым.

Ақпаратты Алматы ПД растады.

«Кісі өлтіру фактісі бойынша қылмыстық іс қозғалды. Күдікті ұсталып, уақытша ұстау изоляторына қамалды. Алдын ала мәліметтер бойынша, азаматтар арасында жанжал шыққан. Өзге деректер анықталып жатыр», - деп хабарлады полиция.