Жетісуда 23 жастағы жігіт автотұрақта тұрған көлікті ұрлап кеткен

Жетісу облысында полицияның кезекші бөліміне хабарласқан жергілікті тұрғын белгісіз адам көп қабатты үйдің алдындағы автотұрақта тұрған «Мерседес» маркалы автокөлікті ұрлап кеткені туралы арызданды, деп хабарлайды Azattyq Rýhy облыстық ПД-ға сілтеме жасап.

Патрульдік полиция қызметкерлері ұрланған автокөлік бойынша жедел-іздестіру іс-шараларын дереу бастады. Өткізілген іс-шаралар барысында бұл көлік Талдықорған-Текелі тас жолында табылып, тоқтатылды.

«Ұрланған көлікті 23 жастағы жергілікті тұрғын басқарған. Күдікті оқиға орнында ұсталып, әрі қарай тексеру үшін полиция бөліміне жеткізілді. Ұсталған адамға қатысты қолданыстағы заңнамаға сәйкес бұлтартпау шарасы қолданатын болады», - делінген хабарламада.

Полиция азаматтарды жедел әрекет ету және құқық бұзушылықтардың алдын алу үшін көлік құралдарына қатысты кез келген күдікті әрекеттер туралы мұқият болуға және дереу хабарлауға шақырады.