Пәкістанда күннің ыстығынан 500-ден астам адам көз жұмды

Пәкістанда күн өтіп қайтыс болғандар саны артқан, деп хабаралайды Azattyq Rýhy BBC-ге сілтеме жасай отырып.

Карачи қаласының мәйітханасына күніне 30-40 адамның денесі жеткізіліп жатыр, кейінгі аптада өліктің саны 568-ге жеткен.

Адамдардың неден қайтыс болғанын нақты айту қиын, дегенмен ауа температурасы 49 °C көтерілгелі өлім-жітім көбейген. Өткен жексенбі мен сәрсенбі аралығында 267 адамға күн өтіп, ауруханаға жүгінген, оның 12-сі қайтыс болған.

Қалада ыстықтан қорғанатын лагерьлер, орталықтар құрылған.

Өткен айда Карачи қаласының Синд ауданында ауа тепературасы рекордтық көрсеткішті көрсетіп, 52,2°C жеткен.

Шекаралас Үндістанның астанасы Дели қаласында мамыр айынан бері аптап ыстық басылмай келеді, ауа температурасы 40°C - 50°C аралығын ұстап тұр.

Сарапшылар ауа-райының осындай экстремалды құбылыстары климат өзгерісіне байланысты қарқын алып, жиілей түскенін айтады.