Щучинскіде әскери колледж кадеті оқ жарақатынан көз жұмды
Қайғылы оқиға 13 ақпанда болған
![Щучинскіде әскери колледж кадеті оқ жарақатынан көз жұмды](https://azattyq-ruhy.kz/cache/imagine/main_page_full/uploads/news/2024/02/14/65cc349ee56ba381895202.jpg)
Щучинск қаласындағы әскери колледждің кадеті оқ тиіп көз жұмды, деп хабарлайды Azattyq Ruhy.
Қорғаныс министрлігінің баспасөз қызметі хабарлағандай, қайғылы оқиға 13 ақпанда болған.
«Ш. Уәлиханов атындағы Әскери колледжінде 1 курс кадеті тәуліктік кезекшілік міндетін өтеуге кірісу барысында бекітілген қарудан өз-өзіне оқ жарақатын жасау нәтижесінде мерт болды», - делінген хабарламада.
Аталған факт бойынша қылмыстық іс қозғалды. Оқиғаның себептері мен мән-жайы анықталу үстінде. Тергеу мүддесіне сәйкес басқа ақпарат жария етілмейді.
«Қорғаныс министрлігінің басшылығы және Әскери колледждің жеке құрамы кадеттің отбасы мен жақындарына қайғыларына ортақтасып көңіл айтады», - делінген мнистрдік хабарламасында.
Айта кетсек, ҚР Қорғаныс министрлігіне қарасты Шоқан Уәлиханов атындағы әскери колледжі Ақмола облысының Щучинск қаласында орналасқан. Колледж Қарулы Күштер үшін кәсіби сержанттар дайындайтын негізгі орталық саналады.