Оралда балалар өнер мектебінен өрт шықты

Оралда балалар өнер мектебінің шатыры өртенді, деп хабарлайды Azattyq Rýhy жергілікті «Мой город» порталына сілтеме жасап.

БҚО ТЖ департаменті баспасөз қызметінің мәліметінше, оқиға 2 қазан күні Деркөл кентінде болған.

«Сағат 17.46-да Н.Башмаков көшесі 6-мекенжайда 5 қабатты тұрғын үйге жапсарлас орналасқан №1 өнер мектебі ғимаратының шатырында рубероидты төсеу кезінде газ қоспасы жарылған (қираусыз). Жалын шамамен 40 шаршы метрді шарпыған. Өртке 3 ранг беріліп, оқиға орнына ТЖ департаментінен 48 адам және 9 техника жетті. Оқиға орнына жеткен кезде 3 ранг расталмады, департаменттен 9 адам 2 техника жұмыс істеді. Олардың жедел әрекет етуі нәтижесінде өрттің өршуіне жол берілген жоқ. Зардап шеккендер жоқ. Келтірілген шығын, өрттің шығу себебі анықталу үстінде», - деп хабарлады департаменттен.

Тілсіз жау сағат 18.00-де оқшауланып, 18.15-те ауыздықталды.