Қайғылы оқиға бүгін таңертең болған
Оңтүстік Кореяда қазақстандық азамат 18-қабаттан құлап мерт болды деп хабарлайды Azattyq Ruhy.
Жергілікті Nocutnews басылымының хабарлауынша, ер адам Кимхэ қаласындағы тұрғын үйдің төбесіне сырлау жұмыстарын жүргізу үшін қорғаныш жолағын орнатып жатқанда абайсызда суағарды басып, артынша құлап кеткен.
Қайғылы оқиға 21 қыркүйекте жергілікті уақыт бойынша сағат 08.25 шамасында (Астана уақытымен 11.25) болған.
«Оқиға орнынан дереу ауруханаға жеткізілгенімен, өкінішке қарай, ауыр жарақат алған 47 жастағы ер адамға медицина қызметкерлері көмек көрсете алмады», - делінген хабарламада.
Қаза тапқан азамат заңсыз жұмыс істеген болуы мүмкін, сондықтан өндірістегі жазатайым оқиғаларды реттейтін заң оның жұмыс берушісіне қолданылмайды.
Тақырыпқа орай: «Кореяда 20 мыңға жуық қазақ жүр»: депутат отандастарымыздың заңды еңбек етуі мәселесін көтерді
Қазіргі кезде елдің Еңбек министрлігі жұмыс орнындағы қауіпсіздік ережелерінің бұзылғанын анықтау үшін оқиға орнын тексеріп жатыр. Сондай-ақ полицейлер жазатайым оқиға екенін немесе қасақана кісі өлтіру дерегі екенін анықтауға кірісті.
Еске салсақ, бұған дейін Түркияда ірі жол апаты салдарынан қазақстандық журналист кішкентай қызымен және күйеуімен бірге қаза тапқан болатын.