Таиландта 18 жастағы қазақстандықтың денесі табылды: СІМ түсініктеме берді
Қазіргі уақытта марқұмның ата-анасы Пхукетке жетті
Таиландта Пхукет аралы маңындағы теңізден 18 жастағы Қазақстан азаматының денесі табылды. ҚР Сыртқы істер министрлігінің ресми өкілі Айбек Смадияров бұл ақпаратты растады, деп хабарлайды Azattyq Rýhy.
«1 қыркүйек күні консулға Пхукет жағалауында жас жігіттің суға батып кеткені және оның Қазақстан азаматы болуы ықтимал деген мәлімет келіп түсті. Екі күнге созылған іздестіру жұмысынан кейін таиландтық құтқарушылар 2005 жылы туған ер адамның денесін судан алып шықты. Марқұмның ата-анасы Пхукетке келіп жетті және денені танып, анықтау процедурасына қатысады», - деді Айбек Смадияров.
Айта кетейік, Пхукет туристік полициясы жұма күні аралдың солтүстігіндегі Най Янг жағажайына жақын жерде әлдебір шетелдік турист із-түзсіз кеткенін хабарлаған болатын.
