Талдықорғанда 28 жастағы ер адам зейнеткерді пышақтап тастаған
Күдікті ұсталып, уақытша ұстау изоляторына қамалды
Талдықорғандық жігіт зейнеткерге пышақ ала жүгірген. 28 жастағы күдікті қамауға алынды, деп хабарлайды Azattyq Rýhy Polisia.kz-ке сілтеме жасап.
21 тамызда 64 жастағы ер адам көпсалалы қалалық ауруханаға пышақ жарақатымен түскен. Жараланған азамат жеке меншік секторынан ауруханаға жеткізілгендігі белгілі болды. Жәбірленуші масаңдау халде болған. Жедел-іздестіру іс-шараларының барысында қалалық полицияның жедел уәкілдері пышақ ала жүгірген күдіктіні анықтап, ұстады.
«Күдікті 28 жастағы ер адам болып шықты, ол өтіп бара жатқан адаммен ұрыс-керіс бастап, ерегістің соңы төбелеске ұласып, тіпті пышақтауға дейін барған. Яғни, екеуі бірін-бірі танымайды, тек бірі екіншісіне ескерту ғана жасаған», – деді Талдықорған қалалық ПБ.
Күдікті ұсталып, уақытша ұстау изоляторына қамалды. Аталған факті бойынша ҚР ҚК-нің 293-бабына (Бұзақылық) сәйкес тергеу амалдары жүргізіліп жатыр. Пышақ тәркіленіп, қылмыстық іс материалдарына тіркелді.
