Нұр-Сұлтанда көшелерді дезинфекциялау қалай өтті?

Нұр-Сұлтан қаласында коронавирус инфекциясының таралуын болдырмау үшін дезинфекциялау бойынша ауқымды жұмыстар жүргізіліп жатыр, деп хабарлайды әкімдіктің баспасөз қызметі.

«Біріншіден, қала көшелері, тротуарлар, аялдамалар және басқа да қоғамдық орындар күнделікті негізде арнайы ерітінділермен дезинфекциядан өтіп жатыр. Дезинфекциялау іс-шараларын өткізуге қалалық қызметтерден басқа қарулы күштердің биологиялық қорғау бөлімшесінің әскери қызметшілері де жұмылдырылды. Қолданылып жатқан ерітінді адамдар мен жануарлар үшін қауіпсіз. Қала аумағын ерітіндімен өңдеуге күнделікті 450 адам қатысады»,- делінген хабарламада.

Әкімдіктің хабарлауынша, әуежайда, вокзалдарда, әлеуметтік нысандарда, базарларда, сауда ойын-сауық орталықтарында және басқа да адам көп жиналатын жерлерде дезинфекциялау шаралары күшейтілді. Санитарлық тәртіп күшейтілді. Жұмыс орындары мен ғимараттарда мұқият өңдеу жүргізіліп жатыр. Барлық қызметкерлер медициналық маскалармен, антисептиктермен және басқа да медициналық қорғаныс құралдарымен қамтамасыз етілді.

«Қалада 2 мыңнан астам тұрғын үй дезинфекциядан өтуі қажет. Пәтер иелері кооперативтері мен қызмет көрсетуші компаниялар үй кіреберістерін, есіктерді, лифттерді, сүйеніштерді, терезе жақтауларын және т. б. дезинфекциялауға міндетті»,- екенін әкімдік еске салады.

Елордада коронавирус инфекциясының таралуына жол бермеу бойынша барлық шаралар қабылданып жатыр. Жедел штаб жұмыс істейді. Қала тұрғындары тәртіпті сақтап, қажетсіз үйден шықпауы, барлық қауіпсіздік шараларын сақтауы қажет.