Маңғыстауда кен орнындағы өрт үш аптадан бері сөнбей жатыр

9 маусым күні Бозашы мұнай түбегіндегі «Оңтүстік Қаратұрын» мұнай-газ кен орнында тұтанған өрт әлі сөнбеді. Мамандар үш аптадан бері қызыл жалынды ауыздықтауға тырысып жатыр, деп хабарлайды Azattyq Ruhy ҚазАқпаратқа сілтеме жасап.

Мамандар өртті сөндіруге мүмкіндік беретін ұңғыманың жобасын әзірлеп жатыр. 1200 метр тереңдікке бұрғылау жұмыстарын жүргізуге шешім қабылдаған. Ал кен орнында қызмет көрсететін мердігер мекеме қызметкерлер санын қысқартуға мәжбүр. Жұмыстан шығарылған 130 азаматты «Бозашы» ЖШС өз штатына қабылдау туралы шешім шығарған.

«Айдеко-160» бұрғылау станогын монтаждау және ұңғыманы салу үшін жол мен алаң құрылысы аяқталды. Қазір бұрғылау станогын жұмылдыру жұмысы жүргізіліп жатыр. Жұмыстың 45 пайызы орындалды. Аптаның соңына дейін аяқтауды жоспарлап отырмыз. Бір мезгілде екінші станок үшін екінші алаңның құрылысын бастау және әзірлеу жұмыстары жүргізіліп жатыр», – дейді «Бозашы мұнай» ЖШС бас директорының стратегиялық даму жөніндегі орынбасары Данияр Дүйсембаев.

Естеріңізге сала кетейік, өрт «Оңтүстік Қаратұрын» мұнай-газ кен орнында 9 маусым түнгі сағат 03.25-те ұңғыманы бұрғылау жұмыстары кезінде, №303 ұңғымадағы бұрғылау құралы көтеріліп кетіп, жер астынан газ-су қоспасы атқылауы себебінен пайда болған. Бір адам зардап шекті.

13 маусым сағат 08:30-дағы жағдай бойынша кратерге 302 текше метр ерітінді төгілді.