Алматы облысында 7 жасар қызды ұрлап әкетіп, зорлаған күдікті ұсталды
30 жастағы күдіктіге қатысты қылмыстық іс қозғалды
Алматы облысында жеті жасар қызды ұрлап әкетіп, зорлық көрсеткен күдікті қолға түсті, деп хабарлайды Azattyq Ruhy тілшісі inAlmaty.kz сайтына сілтеме жасап.
Облыстық ПД баспасөз қызметі хабарлағандай, 7 наурыз күні сағат 20.34-те Талдыбұлақ ауылының тұрғынынан 2012 жылы туған баланың жоғалып кеткені туралы хабарлама түскен. Тәртіп сақшылары дереу жедел-іздеу шараларын жүргізуді бастап кеткен.
«Аталмыш ауылда үй-үйді аралап тексеру барысында шаруашылыққа арналған ғимараттардың бірінің жертөлесінен із-түзсіз жоғалып кеткен бала табылды. Сол жерде 1990 жылы туған Н. атты азамат ұсталды. ҚР ҚК 120-бабының 4-бөлімінде қарастырылған құрамында қылмыс белгілері бар дерек бойынша аталмыш факт сотқа дейінгі тергеудің бірыңғай тізіліміне тіркелді», – делінген баспасөз хабарламасында.
Қазіргі уақытта сотқа дейінгі тергеу жұмыстары жүргізіліп, барлық қажетті сараптамалар тағайындалды.
