Қарағанды облысында газ баллоны жарылып, ер адам қаза тапты
Қайғылы оқиға өткен тәулікте Бұқар жырау ауданында болған
Қарағанды облысында өткен тәулікте тұрмыстық газ баллоны жарылып, ер адам қаза тапты, деп хабарлайды Azattyq Ruhy.
Облыстық төтенше жағдайлар департаментінің басрасөз қызметі хабарлағандай, 15 наурызда ТЖД бөлімшелері 9 рет құтқару жұмыстарына, оның ішінде өртке және жану жағдайларына – 3 рет, авариялық-құтқару жұмыстарына 6 рет шыққан. Құтқарушылардың арқасында 3 адам құтқарылды, оның 1-і – бала.
«Бұқар жырау ауданы Гагаринское ауылындағы тұрғын үйдің ауласында газбен дәнекерлеу жұмыстары кезінде тұрмыстық газ баллонынан газ-ауа қоспасы шығып жарылған. Оқиға орнынан күйік шалған 1957 жылғы ер адамның мәйіті табылды. 1966 жылы туған ер адам қолынан 1, 2-дәрежелі күйік алған. Болжам бойынша жарылысқа газ жабдығын пайдалану кезінде қауіпсіздік талаптарының бұзылуы себеп болған», - делінген ТЖД хабарламасында.
Сондай-ақ Шет ауданы Қайрақты бөлімшесіндегі 2 пәтерлі тұрғын үйде тұрмыстық газ баллонынан (жанусыз) газ-ауа қоспасы шығып, жарылыс салдарынан үйдің шатыры, төбесі, қабырғалары және ішкі қалқалары – жалпы алаңы 70 шаршы метр аумақ опырылған. Қаза болғандар мен зардап шеккендер жоқ. Болжам бойынша оқиғаға газ жабдығын пайдалану кезінде қауіпсіздік талаптарының бұзылуы себеп болған.
«Қарағанды және Балқаш қалаларында ТЖД қызметкерлері жабық кіреберіс есіктерді ашты. 1939 және 1967 жылы туған ересектер мен 2020 жылы туған бала құтқарылды. Әйел адам жедел жәрдем бригадасына тапсырылды», - делінген хабарламада.
