Ақтауда тұрғындарды 7 млн теңгеге алдап кеткен әйел ұсталды
Ол өзін кәсіпкер ретінде таныстырып, жұрттың сеніміне кірген
Ақтауда өзін жеке кәсіпкермін деп таныстырып, тұрғындарды 7 млн теңгеге жуық қаржыға алдап кеткен алаяқ әйел құрықталды, деп хабарлайды Azattyq Ruhy агенттігі Polisia.kz-ке сілтеме жасап.
«Ақтау қаласының тұрғындары өзін жеке кәсіпкер ретінде таныстырып, кейін алдап кеткен алаяққа қатысты полиция басқармасына арызбен жүгінді. Алаяқтыққа барған әйел жәбірленушілердің сеніміне кіріп, олардан жеміс-жидек және балық өнімдерін алған, алайда аталған заттардың ақшасын бермеген. Жәбірленушілерге келтірілген жалпы шығын 6,9 млн теңгені құрайды», - делінген хабарламада.
Криминалдық полиция қызметкерлерімен Anti fraud жедел-алдын алу іс-шарасы барысында 37 жастағы күдікті әйелдің жеке басы анықталып, ұсталды.
Аталған дерек ҚР ҚК-нің 190-бабы (Алаяқтық) бойынша Ақтау қаласы полиция басқармасының сотқа дейінгі тергеп-тексерудің бірыңғай тізілімінде тіркелді. Өзге мәлімет тергеу мүддесінде жария етілмейді.
