Өлімнің алдын ала себебі – жедел жүрек-қантамыр жетіспеушілігі
Бұл туралы Нұр-Сұлтан қаласы Полиция департаментінің баспасөз қызметі хабарлады.
«Нұр-Сұлтан қаласындағы тергеу изоляторында күні бұрын жеткізілген Дулат Ағаділ есімді 1977 жылы туған азамат қайтыс болды. Бұған дейін Дулат Ағаділге қатысты сотқа құрмет көрсетпегені, судьяға, сот отырысына қатысушыларға тіл тигізіп, қылмыстық құқық бұзушылық жасағаны үшін қылмыстық іс қозғалды. Ағымдағы жылдың қаңтар айында ол сырттай кінәлі деп танылып, ешқайда шықпау жөнінде бұлтартпау шарасы қабылданды. Соттың тергеу әрекеттеріне келмеуіне және жалтаруына байланысты қамауға алу туралы бұлтартпау шарасы өзгертілді», - делінген департамент хабарламасында.
Дулат Ағаділ 24 ақпан күні сағат шамамен 21.00-де үйінде ұсталып, ары қарай тергеу изоляторына жеткізілді. Камерада онымен бірге тағы төрт адам болған, олар Дулат Ағаділге қатысты зорлық-зомбылық болмағанын куәландырды.
«Медициналық сараптама қорытындысына сәйкес, ол ұсталған кезде алкогольді ішімдік ішкен және мас күйде болған. Оның өлімі жайлы жедел жәрдем келгенде анықталған. Алдын ала өлімнің себебі - жедел жүрек-қантамыр жетіспеушілігі. Марқұмның денесінде ешқандай жарақат іздері жоқ. Сотқа дейінгі тергеу амалдары басталды», - деп хабарлайды қалалық Полиция департаменті.