Петропавлда жыл басынан бері із-түзсіз жоғалған 83 бала аман табылды

Azattyq Rýhy

Балалардың барлығы бір күннің ішінде табылды

Петропавлда жыл басынан бері із-түзсіз жоғалған 83 бала аман табылды
Фото: ашық дереккөзден

Петропавл полицейлері жыл басынан із-түзсіз жоғалған 83 кәмелетке толмағанды іздеп тапты, деп хабарлайды Polisia.kz.

Облыстық полиция департаментінің мәліметінше, 1 қазанға қараған түні қала тұрғынынан 12 жастағы қызының жоғалғаны туралы хабарлама келіп түсіп, облыстық ПД және Петропавл қаласы ПБ жеке құрамы іздестіру жұмысына тартылды. Қыз телефонын сөндіріп, қоңырауға жауап бермеген.

«Іздестіру келесі күннің түс кезіне дейін жалғасты. Із-түзсіз жоғалған қыз құрбысының үйінде қонып, таңертең кетіп қалғаны белгілі болды. Іздеу нәтижесінде жедел уәкілдер оны бір досының үйінен тапты», - дейді полиция өкілдері.

Қыздың анасымен және қызбен профилактикалық әңгіме жүргізілді.

«Жағдай қызметкерлердің бақылауында болды. Ата-аналарды кәмелетке толмаған балаларының психологиялық жағдайына назар аударуға, өзара жайлы қарым-қатынас орнатуға шақырамыз. Тәуелкел тобындағы балаларды алдын ала анықтау үшін білім, психологиялық-педагогикалық қызметкерлерімен өзара іс-қимыл жасай отыра, осындай фактілердің алдын алуды күшейту жоспарланып отыр. 2022 жыл Қазақстанда Балалар жылы деп жарияланды – осы орайда еліміздің кішкентай тұрғындарының қауіпсіздігін қамтамасыз ету үшін қоғам болып күш біріктіру аса маңызды», – деді Петропавл қалалық полиция басқармасы ЖПҚ бөлімі бастығының орынбасары Айдын Ахмағамбетов.

Жыл басынан облыс орталығының тұрғындары полицияға із-түзсіз жоғалған балаларды іздестіру өтінішімен 83 рет жүгінген. Балалардың барлығы бір күннің ішінде табылды. Әрбір іздестіру жұмысына сыртқы қызметтер, ювеналдық және криминалдық полиция қызметкерлері тартылады.

 

×
Бұл желілік ресурстың ақпараттық өнімдері 18 жастан асқан адамдарға арналған.