Алматыда сауда орталығына жарылғыш зат қойылды деген хабарлама тарады

Алматыдағы Forum сауда ойын-сауық орталығының келушілері мен қызметкерлері эвакуацияланып жатыр. Бұл туралы Алматы қалалық полиция департаментінің өкілдері мәлімдеді, деп хабарлайды Azattyq Rýhy.

Белгілі болғандай, бүгін түстен кейін сауда орталығына жарылғыш зат қойылғаны туралы хабар түскен.

«Аталған сауда орталығында жарылғыш зат қойылғаны туралы хабарлама түсті. Осы тектес хабарламаларға қатысты шара аясында эвакуациялық-тексеру жұмыстары ұйымдастырылды. Сондай-ақ саперлер бөлімшесі жұмылдырылып жатыр. Сауда орталығының келушілері мен қызметкерлері қауіпсіз қашықтыққа көшірілді», - деді Алматы полиция департаментінің ресми өкілі Салтанат Әзірбек.

Кейінірек Алматы қаласы ПД өкілі FORUM сауда үйіне жарылғыш заттың қойылғаны туралы ақпараттың расталмағанын хабарлады.

Полицейлер сауда ойын-сауық орталығы әдеттегідей жұмыс істеп жатқанын айтты. Қазір қаланың төтенше жағдайлар қызметі «Алматы халықаралық әуежайына жарылғыш зат қойылды» деген ақпаратты тексеріп жатыр.