Петропавлда айыптұрақта тұрған бірнеше көлік өртенді
Өртті өшіруге облыстық ТЖД күштері мен құралдары жұмылдырылды
Петропавлда қамыстан шыққан өрт айыптұраққа таралып, бірнеше көлікті зақымдады, деп хабарлайды Azattyq Rýhy.
Солтүстік Қазақстан облысы Төтенше жағдайлар департаментінің мәліметінше, 14 сәуір күні сағат 16:30-да 101 телефонына Петропавл қаласындағы Северная көшесі, 1В мекенжайы аумағында қамыс өртеніп жатқаны туралы хабарлама түскен.
«Дереу жеткен өрт сөндіру бригадалары 3 гектардан астам аумақтағы өртті сөндіруге кірісті. Желдің екпіні 10 м/с болғандықтан, оның үстіне, кіретін жолдың болмауы салдарынан өрт Петропавл қаласы әкімдігіне қарасты «Тұрғын үй-коммуналдық шаруашылық, жолаушылар көлігі және автомобиль жолдары бөлімі» мемлекеттік мекемесінің айыптұрағына қарай өтіп кетті», - делінген ТЖД хабарламасында.
Өрт салдарынан 5 автокөлік зақымдалды. Тұрақтағы өрт сөндірілді, қазіргі уақытта қамыстағы өрт сөндіріліп жатыр. Өртті өшіруге облыстық ТЖД күштері мен құралдары (35 қызметкер мен 6 бірлік техника), жергілікті атқарушы органдар (8 қызметкер және 2 бірлік техника) жұмылдырылды.
