СҚО-да аязды түнде адасып қалған әжей құтқарылды

СҚО-да такси жүргізушісі түнде жол бойында адасып жүрген қарт әжейді құтқарып қалды, деп хабарлайды Azattyq Rýhy.

Облыстық Полиция департаментінің мәліметінше, оқиға 28 желтоқсанда болған.

Қарт әжей өзінің мекенжайын есіне түсіре алмағандықтан, такси жүргізушісі мен оның жұбайы әлеуметтік желі арқылы полиция көмегіне жүгінген.

«Оқиға орнына жеткен полиция қызметкерлері әжейдің төлқұжаттағы деректерін анықтап, сол бойынша мекенжайды тапты. Полицейлер зейнеткерді пәтеріне дейін аман-есен апарып салды», - делінген ПД хабарламасында.

Полиция өкілдері қарт әжейдің жалғыз тұратынын, арасында ұмытшақтығы ұстап қалатынын анықтады.

Қазіргі таңда қария учаскелік инспектордың бақылауына алынды.