Алматыдағы Президент саябағы маңынан өрт шықты

Алматы қаласындағы Түңғыш Президент саябағына жақын маңда өрт шықты, деп хабарлайды Azattyq Rýhy.

Қалалық ТЖД мәліметінше, Бостандық ауданының әл-Фараби-Науаи көшелерінің қиылысындағы Үлкен Алматы өзені бойындағы қараусыз қалған кафе өртенген. Қазірше тілсіз жаудың неден шыққаны беймәлім.

«Кешкі сағат 19:44 шамасында құтқару қызметінің пультіне Үлкен Алматы өзенінің бойындағы қараусыз қалған кафеде өрт шыққаны туралы хабар кеп түсті. Қазір оқиға орнында қалалық ТЖД күштері өртке қарсы толықтай жұмылдырылды», - деп мәлімдеді қалалық ТЖД баспасөз қызметі.

Ведомствоның мәліметінше, өрт 20 минут ішінде оқшауланып, сағат 20: 22-де өшірілді. Зардап шеккендер жоқ.

Өртті сөндіруге 50 -ден астам жеке құрам мен 13 техника жұмылдырылған.

Өрттің тез таралуына ағаш конструкциялардың көп болуы себеп болған.