Полицейлер қабылдау пункттерінің иелерін әдейі ұрланған мүлікті сатып алғаны үшін жауапқа тартылатынын ескертеді
Кәріз люктерін ұрлаған павлодарлық ер адам қолға түсті, деп хабарлайды Polisia.kz.
Жылыту маусымы қарсаңында, 27 қыркүйек күні Павлодар полициясына ЖШС-нің біріне тиесілі екі дана люктің ұрланғаны туралы қоңырау түсті.
«Жедел-іздестіру іс-шаралары барысында полиция қызметкерлері 25 жастағы павлодарлық тұрғынды анықтап, ұстады. Ұсталушы түсіндіргендей, кешке Геринг-Хабаровская көшесімен жүріп келе жатып, ол кәріз люктерін көрген. Ол өзіне ақшалай пайда көру мақсатында металды қабылдау пунктіне тапсыру үшін қақпақтарды ұрлап кеткен. Алайда тапсырып үлгерместен қолға түсті», - делінген Павлодар облысы Полиция департаментінің баспасөз қызметінің хабарламасында.
Қазіргі уақытта аталған факт бойынша ҚР Қылмыстық кодексінің 187-бабы 1-бөлігі бойынша сотқа дейінгі тергеу жүргізілуде.
Полицейлер ашық құдықтар үлкен қауіп екенін ескертеді. Онда ересектер мен балалар құлап кетуі мүмкін.
Сондай-ақ, қабылдау пункттерінің иелері әдейі ұрланған мүлікті сатып алғаны үшін жауапкершілікке тартылатынын еске салады.