Алматы тауларында адасып кеткен үш турист табылды

Республикалық жедел-құтқару жасағының құтқарушылары тауда жоғалып кеткен үш туристті тапты, деп хабарлайды Azattyq Rýhy.

28 тамыз күні Республикалық жедел-құтқару жасағының кезекші бөліміне Үлкен Алматы шыңына барар жолда адасып кеткен үш жас турист туралы хабарлама келіп түскен.

«Оқиға орнына РЖҚЖ жедел тобы шықты. Туристер тәжірибесіз болғандықтан, олар құтқарушыларға қай жерде екендерін түсіндіре алмады. Жасақ қызметкерлері жергілікті жерді жақсы білетіндіктен, жігіттердің орналасқан жері шамамен Проходное шатқалы мен Аю Сай шатқалының арасы деп пайымдады», - делінген ҚР ТЖМ Республикалық жедел-құтқару жасағының баспасөз хабарламасында.

Қараңғы түсіп кеткендіктен, құтқарушыларға кез келген шатқал арқылы көтерілу мүмкін болмаған. Сондай-ақ дауыл соғып кеткендіктен және рельеф тік әрі аяқ басқысыз болғандықтан, жедел топ жетекшісі зардап шеккендерге Үлкен Алматы шыңы (теңіз деңгейінен 3600 метр биіктікте) арқылы жету туралы шешім қабылдайды.

«29 тамыз түнгі сағат 02.30-да жедел топ туристерді тапты. Жастар тамақ пен сусыз әрі мұздап қалғандары болмаса, жалпы жағдайы қанағаттанарлық болды. Зардап шеккендерге су және жылы киімдер ұсынған РЖҚЖ құтқарушылары жігіттерді түсіруге кірісті. Екі шатқалды бөлетін жотаға шығуға тура келді. Туристердің физикалық дайындығының болмауына және тас құлау қаупіне байланысты, құтқарушылар баяу және асқан қырағылықпен қозғалды.
РЖҚЖ құтқарушылары барлық кедергілерді жеңе отырып, сағат 11.15-те адасқандарды Проходное шатқалының тасжолында күтіп тұрған туыстарына тапсырды», - делінген хабарламада.