Жамбыл облысында діни бірлестіктің ғимараты өртенді

Жамбыл облысының Т.Рысқұлов ауданындағы ислам діни бірлестігінің ғимараты өртенді. Бұл туралы облыстық ТЖД баспасөз қызметінен хабарланды.

20 тамыз сағат 17:38-де ТЖД кезекші қызметіне Жарлысу ауылында шыққан өрт туралы хабарлама келіп түсті. Қазақстан мұсылмандары діни басқармасы республикалық ислам діни бірлестігі филиалының бір қабатты ғимаратындағы өрт жөндеу жүргізіп жатқан кезде шықққан.

ТЖД мәліметі бойынша, өрт аумағы 90 шаршы метрді шарпыған. Ғимараттың қабырғалары рама, шатыры мембрана жабыннан жасалған. Өрт сағат 19:20-да сөндірілді.

Оқыс оқиғадан ешкім зардап шекпеді. ТЖД қызметкерлерінің болжамы бойынша, өрт отты абайсыз қолдану салдарынан болған.