Қазіргі уақытта аталған дерекке қатысты қылмыстық іс қозғалды
Алматы қаласында жеңіл көлік КамАЗ-ға соғылып, екі адам қаза тапты, деп хабарлайды Azattyq Rýhy қалалық Полиция департаментінің баспасөз қызметіне сілтеме жасап.
Қайғылы жол-көлік оқиғасы қаланың Наурызбай ауданында түскі сағат 12:00 шамасында болған.
«1 сәуір күні «ВАЗ-211440» автокөлігінің жүргізушісі Карьерная көшесінің солтүстік бағытында келе жатып, жолдың қарсы бетіне шығып кетіп, КамАЗ көлігіне соғылған. Жол-көлік оқиғасы салдарынан жеңіл көліктің жүргізушісі оқиға орнында көз жұмды. Ал оның көлігінде отырған 2002 жылғы жолаушы ауруханаға барар жолда қайтыс болды», - деді Алматы қаласы ПД тергеу басқармасының бастығы Олжас Шәріпов.
Департамент өкілі аталған деректің сотқа дейінгі тергеудің бірыңғай тізілімінде ҚРҚК 345-бабы 4-бөлігі бойынша тіркелгенін атап өтті.