Павлодарда жас жігіт кәріз суына тұншығып өлді

Павлодарда канализациялық коллекторды жөндеу кезінде кәріз суы жұмысшыны тартып алып кеткен, - деп хабарлайды Azattyq Rýhy тілшісі.

Екпіні қатты су жігітті 50 метр қашықтықтағы келесі құдыққа дейін ағызып әкелген. Оның денесін коммуналдық қызмет жұмысшылары сол шұңқырдан алып шықты.

«Әріптестері жұмысшыны шұңқырдан ес-түссіз жатқан күйінде алып шығып, жедел-жәрдем қызметін шақырған. Алғашқы медициналық көмек көсетілді. Алайда Ақсу қаласының тумасы тіл тартпастан көз жұмды», - деді Павлодар облыстық Полиция департаменті баспасөз қызметінің маманы.

Марқұмның кәріз суына тұншыққаны анықталды. Тәртіп сақшылары тиісті сараптамалардың барлығы жасалатынын жеткізді.