ШұғылЕлімізде өткен тәулікте 855 адамнан коронавирус анықталды

Алматыда көлік жүргізушісі «Сергек» камераларын алдамақ болған

Жол талғамайтын көліктің иесі жазадан жалтару үшін көлігінің алдыңғы нөмірін аударып жүрген

Алматыда жол талғамайтын көліктің жүргізушісі «Сергек» камераларын алдамақ болған, деп хабарлайды Polisia.kz.

35 жастағы азамат басқарған «Ниссан Патрол» автокөлігі жол қозғалысы ережелерін бұза отырып, жазадан жалтару мақсатында көліктің алдыңғы нөмірін аударып жүрген.

«Сергек» автоматтандырылған жүйесіне мониторинг жүргізу кезінде алдыңғы нөміріне нөмір аударатын механикалық жабдық орнатқан жол қозғалысы ережелерін бұзушы анықталды. Бейнекамераларға жақындаған кезде жол талғамайтын көліктің жүргізушісі көлік құралын басқару пульті арқылы құрылғыға сигнал жіберіп, мемлекеттік нөмірді жасырып отырған. Ол өз көлігінің мемлекеттік нөмірін жасыру арқылы жол қозғалысы ережелерін бұзды, демек, жол қозғалысының басқа қатысушыларына қасақана қауіп төндірді. Бұл жерде ешқандай сылтау болуы мүмкін емес.

Ауыстырылатын нөмірі бар құқық бұзушы ұсталып, әкімшілік заңнамаға сәйкес жауапкершлікке тартылды. Ол бір жыл мерзімге көлік құралын басқару құқығынан айырылды, сондай-ақ оған 20 АЕК көлемінде айыппұл төлеуге тура келеді», – деді Алматы қалалық ПД Әкімшілік полиция басқармасының бастығы Жандос Мұраталиев.

Өткен жылы осыған ұқсас құқықбұзушылық жасағаны үшін 3 192 жүргізуші әкімшілік жауапкершілікке тартылған. Мемлекеттік тіркеу нөмірлік белгіні жасыруға арналған әртүрлі қондырғылар мен жалған нөмірлерді орнату – жол қозғалысы ережелерін қасақана бұзу болып саналады.

«Сондай-ақ, барлық жүргізушілерге қала ішінде орнатылған камералардың бәрінің дұрыс жұмыс істеп тұрғанын және түрлі заңбұзушылықты тіркейтінін ескерген жөн. Жолдың қателіктерді кешірмейтінін әрдайым есте ұстау керек», – деді Жандос Мұраталиев.