Ақмола облысында жол апатынан ауыл әкімі қаза тапты

Ақмола облысында ауыл әкімі жол апатынан көз жұмды, деп хабарлайды облыстық Полиция департаментінің баспасөз қызметі.

14 желтоқсанда сағат 23.30-да Атбасар АПБ кезекші бөліміне жедел жәрдем диспетчерінен Атбасар қаласынан 20 шақырым жердегі «Екатеринбург-Алматы» автожолында ЖКО болғаны туралы телефон хабарламасы келіп түсті.

«Алдын ала мәліметтер бойынша, Батыс Қазақстан облысының Орал қаласының тұрғыны «DAF» маркалы автокөлігінің жүргізушісі көлікті басқара алмай, қарсы қозғалыс жолағына шығып, Державинск қаласының 51 жастағы тұрғыны жүргізіп келе жатқан «Ваз-21214» маркалы автокөлігімен соқтығысқан. Соңғысы алған жарақаттарынан оқиға орнында қайтыс болды», - делінген хабарламада.

Аталған факт бойынша ҚР ҚК 345-бабы 3-бөлігі бойынша сотқа дейінгі іс жүргізу басталды. Сараптама тағайындалды.

«DAF» автокөлігінің жүргізушісі УҰИ-ға қамалды. Тергеу амалдары жалғасуда.

Жол апатынан қаза болған ер адам – Мирасхан Балғабекұлы Мұратов – Ақмола облысының Жақсы ауданы Тарасовка селолық округінің әкімі. Аудан әкімдігі бұл мәліметті растады. М.Мұратов 1969 жылғы 10 мамырда дүниеге келген.