Павлодарлық жүргізуші бір айда 64 рет жол ережесін бұзған

Полиция қызметкерлері айыппұлды төлемеген адамдарды анықтау бойынша тұрақты негізде рейдтер жүргізеді, деп хабарлайды Polisia.kz.

«2020 жылғы 18 қарашада Павлодар қаласында Н.Назарбаев даңғылы бойындағы №287 үйдің жанында «Nissan Sentra» автокөлігі тоқтатылды. Көлік 28 жастағы павлодарлықтың басқаруында болды. Деректер базасын тексеру кезінде жүргізушінің жалған мемлекеттік нөмірлері бар автокөлікпен жүріп-тұратыны және автокөлік үшін әкімшілік айыппұлдар бойынша 1 млн 389 мың теңге сомасында берешегі бар екені анықталды. 2020 жылдың 1 қазанынан бастап оның жол қозғалысы ережелерін 64 рет бұзғаны анықталды, олардың барлығы фото-бейнетіркеу арқылы тіркелді», – деді брифингте Әкімшілік полиция басқармасының бастығы Дулат Төкенов.

Полиция жүргізушіге қатысты ҚР ӘҚБтК-нің 590-бабының 4-бөлігі бойынша әкімшілік іс қозғады. Енді оған 20 АЕК көлемінде айыппұл немесе автокөлік жүргізу құқығынан айыру қаупі төніп тұр.

Тәртіп сақшылары «Nissan Sentra» автокөлігі арнайы айыппұл тұрағына қойылғанын атап өтті, автокөлік материал сотта қаралғаннан кейін және барлық айыппұлдарды төлегеннен кейін беріледі.

Айта кету керек, осы жылдың басынан бері түрлі заңбұзушылықтар үшін 2 916 автокөлік айыппұл тұрағына қамалды.