Қару асынып, видеоға түскен жігіттің кім екені анықталды

Елорда полициясы бірнеше күн бұрын әлеуметтік желіде видеосы тарап кеткен «бақайшығына дейін қаруланған» жігіттің кім екенін анықтады, деп хабарлайды Azattyq Rýhy Нұр-Сұлтан қалалық полиция департаментінің баспасөз қызметіне сілтеме жасап.

«Әлеуметтік желілерде 14 қарашада тараған аталмыш видеоға қатысты Полиция департаменті жедел іздестіру шаралары барысында 24 жастағы қала тұрғынын анықтады», – деді қалалық полиция департаменті өкілі.

Қазіргі уақытта ҚР Қылмыстық кодексінің 287-бабы бойынша сотқа дейінгі тергеу амалдары жүргізіліп, видеодағы жігіт іздестіріліп жатыр.

Айта кетсек, бұған дейін «Астана-сергек» Instagram парақшасында жас жігіттің қару ұстап, «Астана біздікі» деген видеосы тараған болатын. Видеода жас жігіт бірнеше қаруды ұстап, былапыт сөздер айтқан еді.