Шетелден оралғандарды карантинге жатқызу мерзімі неге 7 күнге созылды?

Денсаулық сақтау вице-министрі - бас мемлекеттік санитарлық дәрігер Ерлан Қиясов Қазақстан шекарасына ПТР-анықтамасыз келген жолаушыларды карантинге жатқызу мерзімі не себепті 7 күнге дейін ұзартылғанын түсіндірді.

«Біз адамдарға сақтық шараларын сақтау керегін қаншама рет түсіндірдік. Шетелге шығып, шет елдерден оралған кезде өзіңізді ғана емес, ұшақ кемесінде болатын басқа адамдар туралы да ойлануыңыз керек. Ұшу уақыты кемінде 5-6 сағатқа созылады. Елге оралатын қазақстандықтардың 20 пайызы ПТР-тестілеуден уақытында өтпеген. Ал тестілеуден уақытында өткен қалған 80 пайыз жолаушы денсаулығы үшін алаңдап, түрлі сауал жолдайды. «Жанымда отырған адам ПТР-тестін уақытында өтпесе, мен өзіме және отбасыма қауіп төндірмеймін бе?» деген алаңдаушылық болады. Бір жағынан, әуе компанияларын ұшақ бортына ПТР-анықтамасыз азаматтарды жібермеуге міндеттейміз. Бірақ әртүрлі жағдай болатынын ұмытпауымыз керек. Қазақстандықтардың елге оралуына тыйым сала алмаймыз», - деді Ерлан Қиясов.

Мемлекеттің бас санитар дәрігері кей жолаушылардың елге оралғаннан кейін қате пікірде болатынын да атап өтті. Жолаушылардың көбі «ПТР-анықтамасыз келсек, екі күн Radisson қонақүйіндегі ауруханада жатамыз» деп ойлайды екен екен.

«Іс жүзінде, бұл қайта жабдықталған стационарлар. Тиісті анықтамасыз оралғандарды 7 күн карантинге жатқызу – ескерту шарасы сияқты. Бір апта уақытын жоғалтқысы келмеген азамат тест тапсыруға мәжбүр болады. Меніңше, халық бұған түсіністікпен қарайды», - деді бас санитар.

Сымбат Ғалымжан, Нұр-Сұлтан