Қырғызстанда болған митингте зардап шеккен мыңға тарта адам дәрігер көмегіне жүгінді

Қырғызстанда болған митинг салдарынан зардап шеккен 911 адам дәрігер көмегіне жүгінді. 19 жастағы жігіт ауыр дене жарақатынан қайтыс болса, тағы 5 науқас жансақтау бөлімінде жатыр, деп хабарлайды Azattyq Rýhy тілшісі Қырғызстанның Кабар агенттігіне сілтеме жасап.

705 адам амбулаториялық ем қабылдауға жолдама алса, 205-і түрлі деңгейдегі дене жарақаттарымен ауруханаға жатқызылған. 

Бішкектегі травматология және ортопедия ғылыми-зерттеу 452 адам түскен, осы тізімдегі 82 науқас ауруханаға жатқызылды. Дәл осы емдеу мекемесінің жансақтау бөліміне бір адам жатқызылды. 

Қырғызстан Ұлттық госпиталіне 269 адам түскен, оның 85-і ауруханаға жатқызылған, қалғанына алғашқы медициналық көмек көрсетіліп, дәрігерлер нұсқауы бойынша емді үйлерінде жалғастырмақ. 4 сырқат жансақтау бөлімінде жатыр. 

Бішкек қалалық №1 клиникалық емханаға 58 адам келген. 48 адам амбулаторлық ем алуға жолдама алды. 10 адам ауруханада дәрігерлер қарауында болады. 

Тағы 112 адам Шу облыстық ауруханасынан жәрдем сұраған. Оның 100-і амбулаторлық ем қабылдайды. Қалғаны ауруханаға жатқызылды. 

Ұлттық хирургия орталығы 20 адамды қабылдады. Оның 4-і амбулаториялық әдіспен емделсе, қалғаны ауруханада жататын болады.  

«Барлық емделушілерге тиісті медициналық жәрдем беріліп жатыр. Жауапты  мамандардың кеңесі берілуде, зардап шеккендер дәрілермен қамтамасыз етілді», - делінген Қырғызстан Денсаулық сақтау министрлігі баспаөз қызметі таратқан хабарламада.