48 оқушы ауруханаға түскеннен кейін мектепте тексеріс басталып, сабақтар уақытша онлайн форматқа ауыстырылды
Оқу-ағарту министрлігі жедел ішек инфекциясының белгілерімен 48 оқушы ауруханаға түскеннен кейін Алматыдағы Республикалық физика-математика мектебіне (РФММШ) мониторингтік топ жіберді, деп хабарлайды Azattyq Rýhy.
Қазіргі уақытта мектепте Балалардың құқықтарын қорғау комитетінің, тиісті аумақтық органдардың және «Өркен» балалардың әл-ауқаты ұлттық ғылыми-практикалық институтының өкілдері қатысқан мониторингтік топ жұмыс істеп жатыр.
Денсаулық сақтау министрлігінің мәліметінше, мектептің ас блогынан санитариялық талаптардың бұзылғаны анықталған. Қазір шектеу шаралары енгізіліп, оқиғаның мән-жайын анықтау жұмыстары жүргізіліп жатыр.
«РФММШ-ның директорлар кеңесі мен басқармасына тамақтандыруды ұйымдастыруға және санитариялық талаптардың сақталуына бақылауды күшейту, сондай-ақ оқушылардың қауіпсіздігін қамтамасыз ету тапсырылды», – деп мәлімдеді ведомство.
Оқушылардың қауіпсіздігін қамтамасыз ету және оқу процесінің үздіксіздігін сақтау мақсатында сабақтар уақытша қашықтан оқыту форматына ауыстырылды.
«Қазіргі уақытта басты міндет – оқушылардың қауіпсіздігі мен құқықтарын қорғау, оқиғаның мән-жайын жан-жақты анықтау және тексеру нәтижелері бойынша қажетті шараларды қабылдау», – деп атап өтті министрлік.
Ведомствоның мәліметінше, жағдай Денсаулық сақтау министрлігімен бірлесіп, тиісті қызметтер мен Оқу-ағарту министрлігінің бақылауында.
Еске салайық, Алматыда РФММШ-ның 48 оқушысы ішек инфекциясының белгілерімен ауруханаға жатқызылған. Осыған байланысты мектептің, интернаттың және ас блогының жұмысы уақытша тоқтатылды.
Полиция қылмыстық іс қозғады. Санитариялық-эпидемиологиялық қызметтің тексеру қорытындысы негізінде оқиғаның мән-жайы анықталып, процессуалдық шешім қабылданады.