Қарағандыда көпқабатты үйдің терезесінен сәби құлап кетті
Жыл басынан бері облыста балалардың терезеден құлауына байланысты 20-дан астам оқиға тіркелді. Соңғы күндері осындай бірнеше жағдай қайтадан орын алды
Қарағандыда Әлихан Бөкейхан ауданында үш жасар бала терезеден құлап кетті. Ол шұғыл түрде ауруханаға жеткізілді, деп хабарлайды Azattyq Rýhy ekaraganda.kz сайтына сілтеме жасап.
16 маусым күні сағат 16:00 шамасында 15-ықшамаудандағы үйлердің бірінде екінші қабаттағы пәтердің терезесінен 2022 жылы туған ұл бала құлап кеткен. Оқиға болған кезде бала бөлмеде жалғыз болған, ал оның әпкесі көрші бөлмеде жүрген.
Салдарынан бүлдіршін түрлі жарақат алған. Ол Қарағанды облыстық балалар клиникалық ауруханасына жатқызылды. Дәрігерлердің мәліметінше, баланың жағдайы орташа ауыр деп бағаланып отыр.
Соңғы күндері өңірде осындай бірнеше оқиға тіркелді. Құтқару қызметтері ата-аналар мен туыстарына кішкентай балаларды мұқият бақылауда ұстау қажеттігін үнемі еске салып келеді. Әсіресе, үйде терезелер ашық тұрған кезде сақ болған жөн.
Мамандар масаға қарсы торлардың қауіпті екенін де ескертеді. Сырт көзге берік көрінгенімен, олар салмақ көтеруге арналмаған және баланың құлауына тосқауыл бола алмайды.
Төтенше қызметтердің мәліметінше, 2026 жылдың басынан бері Қарағанды облысында балалардың терезеден құлауына қатысты 22 жағдай тіркелген. Мұндай қайғылы оқиғалар көбіне ересектер баланы қауіпсіз жерде жүр деп ойлап, аз уақытқа болса да қырағылықты жоғалтқан сәттерде болады.
Көп оқылған
